Lehen mundu gerla - Azken agurraren negarra kantua - Ustiapen pedagogikoa

Kantua

Beste bertsio bat : http://www.youtube.com/watch?v=vw8hMUAI7JU

Wikipediaren aurkezpena : http://eu.wikipedia.org/wiki/Azken_agurraren_negarra

Azken agurraren negarra Gorka Knörr abeslariaren abestia da. Kantu honek Ipar Euskal Herritik Lehen Mundu Gerrako guda lekuetara Frantziaren alde borrokatzera joan ziren euskaldunak aipatzen ditu. Abestiak dioen bezala, haietako askok frantsesez hitz egiten ere ez zekitelarik, «Morts pour la patrie» («aberriarengatik hilak») izan ziren. Izan ere, Lehen Mundu Gerrak Ipar Euskal Herriko gizon asko hil zituen, eta ia herri guztietan jarri zituzten «combattants morts pour la patrie» («aberriaren alde hildako gudariak») dioten plakak.

Transkripzioa

Nora zoaz Euskal gaztea arma hori eskutan
Armen atzera deitzen naute Frantsen aldera
Eskual Herritik urrunduz ta atzerrira joanak
Ah ze negarra entzunen duzu Euskal Herrietan
 
Morts pour la patrie
eskuara baizik etzekiten haiek
 
Gure historian zehar zenbat malko ta ezbehar
Landetaratu gindutenekilan dugu orain hil behar
Bere ama agurtu du etxolako atarian
bere amak bisitatuko du atzerriko hilobian

Gorka Knörr

Wikipediaren aurkezpena : http://eu.wikipedia.org/wiki/Gorka_Kn%C3%B6rr

Gorka Knörr Borrás (Tarragona, Katalunia, 1950eko otsailaren 2a) euskal abeslaria eta politikaria da. Aita gasteitarra eta ama katalana ditu. Henrike Knörr euskaltzain zenaren eta Roman Knörr enpresaburuaren anaia da.

Umea zelarik Tarragonatik Gasteiza etorri zen. Bere belaunaldiko abeslarien artean beti Arabaren ordezkaritzat jo izan da. 1971an lehenbiziko aldiz jendaurrean abestu zuen eta handik gutxira Araba kantari diskoa kaleratu zuen. Halere, bere musika ibilbidea zein izango zen argikiro agertarazten zuen diskoa bigarrengoa izanen zen. Hau 1975an Nik nahi dudana izenburupean argitaratu zen.

1976an Txalaparta diskoa kaleratu zuen, honekin Gorkak benetako arrakasta lortu zuen eta diskoaren salmentak ugaritu egin ziren. Txalaparta abestia eta Xabier Lete euskaratutako Lluis Llachen "L’Estaca" abestia salmenten gorakada horren nolabaiteko "errudunak" dira.

Politikari gisa ere Gorka Knörr Eusko Alkartasuna alderdiaren idazkari nagusi eta eurodiputatu izan zen. Alderdi honekin Eusko Legebiltzarreko lehendakariordea ere izan zen. Azken postu horretan zegoela Sozialista Abertzaleak alderdia ez desegiteagatik Juan Mari Atutxa (EAJ) eta Kontxi Bilbaorekin (Ezker Batua) batera auziperatua izan zen.

2006an Eusko Alkartasuneko kide izateari utzi zion.

Ulermen galderak

  1. Zer da kantuaren testuingurua ? (noiz ?) Justifika.
  2. Nor dira kantuko protagonistak ?
  3. Nondik nora joan behar du gizonak ?
  4. Zer zentzugabekeria (absurdité) azpimarratzen du autoreak ?
  5. Beste zein gertakari historikori erreferentzia egiten dio kantuak ?
  6. Zer bukaera iragarria (prédire) da ?

Ustiapen pedagogikoak

Azken agurraren negarra kantua - Ustiapen pedagogikoa
Azken agurraren negarra kantua - Ustiapen pedagogikoa

Eskolan baizik ez baliatzeko.