Oihana ikastolako haurrek Juan Kruz Igerabideren ezagutza egiteko xantza ukan dute 2017ko martxoaren 30ean. Olerkaria dugu Igerabide, eta milaka olerki idatzi ditu. Batzuk liburu ederretan argitaratu dira, beste anitz han-hemenka barreiatuak dira, hostoak haizearekin nola. Elkarretaratze hau Libreplume elkarteak antolatu du Le Petit Bouquinville festibalaren karietara. Olerkariarekin bildu aitzin, haurrek haren obraren ezagutza egina zuten Gorputz osorako poemak liburuaren bidez. Haren nortasun-agiria asmatu zuten eta araberako galderak prestatu. Gainera bakoitzak kantu bat idatzia zuen eta hari kantatu. Denak prest eta kurios etorri dira elkarretaratzera eta idazle biziki laketa eta hurbilerraza kausitu dute. Gainera, galdera guziei erantzun die. “Maite duzu olerkiak idaztea?”, galdetu dio batek. “Bai! Baina, badakizu, olerkia barnean dut eta atera behar da, poza edo tristura, atera behar da...” “Ametsik baduzu bizitzan?” “Asko! Ameslaria naiz. Batzuk gauzatzen ditut, baina ez denak. Adibidez, ez naiz Everestera iganen...”

Bitartean, beste ikasle batzuk Juan Kruz Igerabideren beste obra baten inguruan lan egin dute: Elena Odriozola marrazkilariarekin egin duen Ur: euriaren liburua. Haurrek “haiku” testu japoniarren gisako olerki laburrak idatzi dituzte (edo hautatu, ttipien kasuan) euriaren inguruan. Gero, Elena Odriozolak aipatu liburuan egin duen bezala, siluetak marraztu dituzte, eta euri-xortak karta garden baten gainean, euriaren poesia adierazteko.

Euria
Zeruan hodeiak,
Hodeietan euria,
Eurian ura.
Ortzantzean kazkabarra
Kazkabarrean izotza.
Noe (3. Urtea)

Haizea
Euria busti-bustia ezin ikusi.
Txakur busti gaixoa
euri azpian.
Eloixa (3. Urtea)

Euriaren tanta
Batzuetan fite doa
eta busti-bustiak gira
plik-plok
euria joaten da.
Ezti (4. Urtea)

Ikus 2017ko urtarrileko Gelako leihotik: Galtzerdi marradunak

IKASOLAS