Udako goiz,
goiz goizeko ihintzetan
zenbat izar !
Zer zeru !
Lore bakoitzean.

Ortzia lorez, lurra izarrez / JosAnton "Hartzut" Artze, Elkar, 2003

 - - - 
Lorearekin maitemindu
zela zioen erlea 

Zein ederra zaren
esan zion eriak loreari
eta zzzuupp 
lore-hauts pixka bat
xurgatu zion. 

Ze usain gozoa daukazun
esan zion erleak loreari
eta zzzuupp 
lore-hauts pixka bat 
zurrupatu zion. 

Txoratuta naukazu
esan zion erleak loreari
eta zzzuupp 
lore-hauts pixka bat 
hurrupatu zion. 

Maite zaitut
esan zion erleak loreari
eta zzzuupp
lore-hauts pixka bat
zupatu zion. 

Nirekin eramango zaitut
esan zion erleak loreari 
eta gezurraz oharturik, 
zzzzuupp
lore-hostoek xurgatu zuten 
erlea. 

Piztipoemak eta beste xomorro batzuk, Leire Bilbao, Pamiela, 2016

 - - - 
Tximeleta

Lirain-liraina
apain-apaina
margo ozena 
lore okerra
lore zuzena
lore gizena
pinpilin gora
pinpilin behera
pinpilin pausa
tximeleta izena 

Barruko leihoa, Pello Añorga, Pamiela, 2016

 - - - 
Bihar

Zangoak lurrean, besarkadak oraindik faltan.
Ezin da atzera egin, hobe !
Erabat galdu ginen han...
Ez genuen mirailan mehatxua ikusi nahi.
Nola utzi bide bat, beste biderik omen ez
denean ?

Baina kolpe batez, bortxaz den dena gelditu da.
Mundrun ta zementuzko egia pitzatu da.
Zer eginen dugu orain ? Zuloak tapatu ?
Ala artesi bakoitzean proiektu bat landatu ?

Sortu, hazi, hezi,
ikasi, irakatsi,
hautatu, erabaki,
berriz bizi arazi,
konpondu ta trukatu,
jan ta elikatu,
ahal den dena birtokiratu...

Bihar, hementxe bertan da...
Utzazu atzokoa atzean, bihar hementxe bertan da.
Bihar, hementxe bertan da...
Utzazu atzokoa atzean, bihar hemen egiten da.

Energia, kultura, kontsumoa, laborantza ala
ekonomia,
kudeaketa, osasuna ala hezkuntza gure eskura
izan daitezela.

Bihar, hementxe bertan da...
Utzazu atzokoa atzean, bihar hementxe bertan da.
Bihar, hementxe bertan da...
Utzazu atzokoa atzean, bihar hemen egiten da.

Hementxe eta oraintxe...
Bihar hementxe bertan da.
Bihar hemen egiten da.

Jurgi Ekiza
Kantua
Klipa

 - - - 
Utopia

Mundu berri bat eraiki
zaharra puskatuz.
Utopia batetik
amets batetik
etorkizun batetara

Ezin erranezko hitzak, / Ttotte Etxebeste, Maiatz

 - - - 
Korona bertsuz

Aste lll apirilaren 6-10 Airea « Etxahun eta Obando »

Apirila 6a
Gasola xühürrago / auto gütiago
Hegazkin büztan xuri / zelüan apürrago
Itsas ibilaldiak / ere mendreago
Birusa bakarra da / kurri gehiago
Gü mandotako hartüz / ezin merkeago

Apirila 7a
Ezin ikus girade / niholaz bírusik
Arte hortan oihanak / ez egiten hotsik
Eziz lili berriak / debaldeko hitzik
Ez otoi erran haltzak / ez düla bihotzik
Natura beti doa / aitzina bizirik

Apirila 8a
Makro ekonomia / denean peko maldan
Kaskaka zühainetan / Üküla nabailan
Ekia agert eta / erle mandoak Ian
Elür txoriak ere / ezin büru eman
Abereak ez fida / jenteen erranetan

Apirila 9a
Macron Merkel Trump Johnson / Bolsonaro Putin
Haiekin bildu ziren / Salvini Xi Jinping
Bilküra hon izan zen / gei seriosekin
Doi doia joan gabe / bazkari züen egin
Monsanto Bayer eta / Sanofi sükaltin

Apirila 10a
Denbora gelditü da / üko gozo gazi
Ez dakigu gaitz hori / xüxen nola hezi
Zer jaukitüko ere / bihar edo etzi
Bi mila ta hogeian / Covid hemeretzi
Covid hogeia otoi / hozkailüan ützi

Mixel Etxekopar (2020ko ekainaren 4ko Herrian)

Ikus 2020ko otsaileko olerkia : Sekretu xuxurlatuetan

IKASOLAS