Poesia nahas-mahas adin guzientzat... Irriaren iturrian

Irriaren iturria

Hemen irriaren iturrian,
Zoriona eta beldurra,
Lilura eta haserrea,
Lerroka gurutzatzen dira, 
Flotatuz lurrunetan.

Nonbait, irriaren iturrian,
Xirripa eta zurrusta
Arraina eta erreka 
Espirala batean kiribiltzen dira 
Zurrunbilotan!

Irriaren iturriak,
euri mendi eta lainoen itzalak
biltzen ditu zolaraino, 
uhinak amestuz!

Irriaren iturrian,
Laminak daudeno kantuz,
Urak loria dario, negarrak baztertuz,
Eta gaitzak senda ditzake
gorputzak torratuz!
Irriaren iturria da hau!
Inguruko itxuren eskulturak,
bil ditzakeenak,
erroetaraino!

Minbera, haserre
Negar eta malurrak
Isuri bizitan, igor ditzakeenak,
Zubiperaino!

Bai! irriaren iturria da hau!
Indarren itsasoz,
zoriona haziz mendeak dirau
zoritxarra itoz.

Luixa Guilzu
Fonolasa trinkoak

(...)
B
Banindoake
begiz
biluztera buru eta bihotz,
bozkarioa!

D
Duenak
dio
dela.
Domaia
dena
ez dakiela.
(...)
G
Garenak
gira
gu.
Gazi, grazi
gezi
gozo.

(...)

Z
Ziloaren
zolaren, zolan
zurubi bat,
zauritik
zorionera igotzeko,
zernahitako
zorabiatuz.

Luixa Guilzu

Bizi zilipurtak : Poemak, Maiatz, 2020
Benetako bihotza

Irribarre zaharra
Txano Gorritxorena,
zurezko gorputza
Pinotxorena,
ihintzezko malkoak
Edurne Zurirenak,
buru-azkarren puxikak
Peter Panenak,
eta benetako bihotza
Berunezko Gudaritxoarena.

Juan Kruz Igerabide
Arrastiriko haize leuna

Tximeleta bat kantari
hegalezko ezpainekin;
zuhaitzak begira
eta hostoak txaloka.

Juan Kruz Igerabide

Euria

Heze-heze
busti-busti
euri-euri.
Pareta zulotik
atera dira luxe-luxe
antena bi.
Zeruak negar
barraskiloak irri.

Joxan Ormazabal

Txori kantariak, poeta hegalariak, Elkar, 2010

Etxeko sutondoan
zu ondoan
etxeko sutondoan
zu ondo han
etxeko sutondoan
zu hondoan...
Suaren abaroan
zu haren esperoan
soaren goxoan
ipuinaren altzoan
etxeko sutondoan.

Jon Suarez
Ilbetea dilindan, Pamiela, 2002

Ikus 2020ko ekaineko olerkia Ez otoi erran haltzak ez düala bihotzik