"Xantza dugu hiru hizkuntza ezagutzen baititugu."
Baigorriko Jean Pujo ikastetxe publikoan, hizkuntzen irakaskuntzak leku handia du. Ikasle guziek gaztelania eta ingelesa ikasten dute seigarrenetik aitzina, eta gehienek euskaraz ikasten dute elebidun ereduan. Gainerakoek euskara hautuzkoa dute. Beraz, hiru hizkuntzen artean ibiltzen dira, frantsesaz gain. Testuinguru horretan, hiru irakaslek Hezkunde Nazionalaren proiektu berritzaile deialdi bati erantzun diote. Proiektu deialdiaren xedea mendiko ikastetxe ttipien balioztatzea da, hizkuntzen irakaskuntzaren bidez. Ingeleseko, euskarako eta gaztelaniako irakasleek, "hizkuntzen txirikordatzea" izendatu duten proiektua muntatu dute, jarduerak hiru hizkuntzetan proposatuz. Proiektua duela hiru urte abiatu zuten, ikasgela bakar batekin. Heldu den urtean, lau mailek parte hartuko dute, Hezkunde Nazionalak oren gehiago eman baitu, proiektuaren balioa ezaguturik.

"Euskara hobeki dakigu eta euskarak laguntzen du espainola lantzen."
Proiektuaren bitartez ikasleen hizkuntza gaitasunak azkartu nahi dituzte, zubiak sortuz. Hobeki menderatzen duten hizkuntza batean oinarrituz, konfiantza gehiagorekin ari dira beste mintzairan/mintzairetan. Batetik bestera pasatzea errazagoa da eta hizkuntzen arteko nahasteak ttipitzen dituzte. Ez da hierarkizaziorik atzerriko eta tokiko hizkuntzen artean, ez eta lehiarik. Proiektuak, batez ere, zailtasun handiak dituzten ikasleei aukera ematen die mintzatzeko eta balioztatuak izateko, gutienez hiru hizkuntzetarik batean.

"Goxo da, lasai ikasten dugu, baina serioski ari gira!"
Astean ordubetez, hiru irakasleekin elkartzen dira ikasleak, hainbat gairen inguruan: moda desfile baten antolaketa, etxe trukatzeko telefonozko elkarrizketen antzeztea, agiantza karten lehiaketa, zinemari buruzko memoria joko baten sorkuntza, Biarritz Amerique Latine festibalari loturik... Mintzairaz “txirikordatzen” dira, eta ikasleek giro lasaia gozatzen dute. Are gehiago, jarduerak ez dira notatuak. Ebaluazioak gaitasunez egiten dira, eta beti oinarri positiboan. Ikasleen konfiantza eta parte-hartzea modu aktiboan lehenesten dira.

"Pentsatzen dugu [hizkuntzen txirikordatze proiektua] diferenta dela."
Ikasleek lanaldi jostagarriagoak eta lasaiagoak preziatzen dituzte. Aldiz, Irlandara egin behar zuten urte bukaerako bidaiaren ezeztatzeak, pandemiaren ondorioz, laugarren mailako ikasleak zinez nahigabetzen ditu.
Irakasleei proiektuak denbora anitz jaten die, baina aberasgarria iruditzen zaie, batez ere ingeleseko inspektore Rochard andereak ekarpen didaktikoak direla medio. Ikastetxearen nortasuna aberasten du hizkuntzen inguruan eta dinamika positiboa sortzen.

Ikus 2020ko azaroko Gelako leihotik: Artigal metodoa, ulermenetik ekoizpenera
IKASOLAS