Otso bihozbera - batuaz

Geoffroy de Pennart-en Le Loup sentimental albumaren itzulpena.

Lehen mailako 2. zikloarentzat.

Ustiapen pedagogikoa

Alegia honetan, protagonista nagusia haur ipuinetako pertsonaia arketipoa da: otsoa. Lukas otsoari gurasoen etxea uzteko unea iritsi zaio. Gurasoen aholkuen artean, Lukasek aitarengandik jan behar duenaren zerrenda jasotzen du. Zerrenda horretan, ipuin batzuetako pertsonaiak azaltzen dira: txanogorritxo, hiru txerrikumeak, 7 antxumeak… Ipuinean zehar pertsonaia horiekin topo egingo du, baina ez ditu jango, gure otsoa bihozbera delako… Azkenean, bere menuan agertzen ez den beste pertsonaia batekin topo egingo du; ogro batekin, eta hori bai jango duela. Liburu ilustratu honetan, marrazketa eta maketazio klasiko baten barnean oso adierazkorrak suertatzen dira pertsonaiak eta egoerak. Izan ere, marrazkiek pertsonaien umorea eta xarma erakusten dute orriz orri.
Galtzagorri elkartea

Sarean

Zer egingo dugu otsoarekin?
http://paperekoa.berria.info/plaza/2009-01-18/044/567/zer_egingo_dugu_otsoarekin_azala_ala_mamia_garapen_jasangaitza.htm
Ipuin tradizionaletako otsoa, betiko otso beldurgarri hura, nortasun berriz jantzi dute liburu honetan: sendi bat eman diote, sentiberatasuna ezarri diote, izaki hunkigarri gisa gorpuztu dute, eta jada ez da gehiago beldurgarri. Orain jatorra da otsoa, munduz mundu abiatzeko tenorea iritsi zaion gaztetxoa. Betidanik bere sendiak egindakoa egitera irten da mundura, hiru txerrikumeak jaten saiatu, zazpi antxumeak, Txanogorritxo,... zerrenda ezaguna dauka eskuan, aitak emana. Baina ez ditu jaten, goseak amorratzen egonik ere haietaz hunkitzen da... Makina bat gurasok eta irakaslek otso bihozbera hau gustuko izango dute, otsoak umeengan izan dezakeen eraginagatik kezkatuta ibiltzen baitira. Horregatik, oker daude, beldurra gure baitan dagoen sentimena baita, bizitzak sortzen dizkigun larritasunetatik eratorria, eta otso beldurgarriak mesede egiten digu, beldur horri gorputz emanez kanpora ateratzen uzten baitio.
Euskara Literatura albumak Otsoa Haur-jalea ahuntza Txanogorritxu Sarbidea Pello Pittikak CP - 1. urtea CE1 - 2. urtea

©Ikas euskal pedagogia zerbitzua