Hiru hilabete idazle baten urratsetan: topaketa Patxi Zubizarretarekin

Iaz, Hendaiako San Bixente eta Donibaneko Dona Maria kolegioetako seigarrenek irakurketa bultzatzeko proiektu batean hartu zuten parte.
Proiektua 2015eko azaroan abiatu zen, eta 63 ikasle elebidun eta 2 irakasle Patxi Zubizarretarekin bildu ziren Nekatoenean (Hendaiako Abbadia Eremuan), han egin zuen idazle-egonaldiaren karietara. Idazlearen lana hobeki ezagutzeko parada izan zen.
Idazle izatea zer den azaldu zien (inspirazioa nondik ateratzen duen, kontakizunaren bizkarrezurra nola eraikitzen duen...) eta beste gauza franko kontatu zien bere liburuei buruz.

Ondotik haren liburu bat irakurri zuten eta taldeka landu: Hiru egun balearen sabelean (Pamiela, 2011). Horretarik abiatuz, zenbait sorkuntza egin zituzten: booktrailerrak (liburua aurkezteko eta irakurtzeko gogoa emateko bideo laburrak), liburuaren segidaren idazketa eta ilustrazioak.
Ondotik, ikasleak berriz Patxi Zubizarretarekin bildu ziren. Gazteek galdera anitz bazituzten liburuari buruz eta Patxiren lanari buruz. Hark, berriz, booktrailer eta ipuin onenak hautatzeko ardura ukan zuen eta irabazleei sariak banatu zizkien.
Xantxo Lekunberri irakaslearen iduriko, idazle bat “egiazki” ikustea esperientzia polita izan zen. Ikasleek ez dutenetz irakurtzeko usaiarik, idazlea ezagutzeak irakurtzeko gogoa laguntzen du, eta interesa pizten. Ikasle batzuentzat ipuinean sartzea pixka bat zaila izan zen hitz batzuk ez baitzituzten menderatzen. Aldiz, irakurketarekin zailtasunak zituzten beste zenbaitek ulermen hobea izan zuten, gaiak interesatzen baitzituen. Geroztik ikasle batzuk mediatekara joan dira beste liburu batzuen mailegatzera.
Patxi Zubizarretaren iduriko ere egitasmo polita izan zen. Horra zer erran zuen Nekatoeneko egonaldia aipatzean: “Atelier horretan lotu nintzaion idazteari [...] eta nire sekretuak pozarren erakutsi eta kontatu nizkien San Bixintxo eta Dona Maria kolegioetako ikasleei –gero, trukean, haiek beren testuak eta booktrailerrak oparitu zizkidaten Hendaiako mediatekan–.”
Esperientzia emankor bat guzientzat...

(Partaideak: Euskal Idazleen Elkartea, Nekatoenea, Ikas, Hendaiako Mediateka.)

IKASOLAS