Poesia nahas-mahas - Goizeko eguzkitan

Poesia nahas-mahas adin guzientzat...

Katua etxeko atarian
orbelei so
bizi da lasai
bizi da eroso.

Zumezko besaulkia
besaulkian kuxina
kuxinaren gainean
katu mutur fina.

Goizeko eguzkitan
etxeko errege
etxeko nagusi
jaun eta jabe.

Jaikitzera doa
halakoren batean
eta baratze guztia
dauka kontrolpean.
(...)

Intxaur azpian, Antton Kazabon – Jokin Mitxelena, Denonartean - 2017

Urarena
Itsasoko tantak zeruraino ihes.
Goian bihurtu dira hodeitxo aldrebes.

Hodeitxo zuriak korrika dabiltza.
Hura da algara! Hura da poz bitsa!

Lasterka itsuan, mendia jo dute.
Orain bekokian pupua daukate.

Badoaz mainaka, tristea itzulera.
euri-malko gisa itsasoko etxera.

Miren Agur Meabe 75. Irria aldizkarian 2018ko maiatza

Papaitak:

Begiratzen badidazu
goi eta behe,
emango dizkizut
artile eta esne.
(Ardia)

Lurrak hazten nau
txapel eta guzti;
sukaldariak prestatzen nau
frijituz edo egosiz.
(Onddoa)

Biribil-biribil txin-txin
metalez ninduten egin;
biribil-biribil txin-txin
eskutik eskura nabil.
(Piezak, txanponak, dirua)

Nik papaita, zuk papaita, Xabier Olaso, Pamiela, 2017

Zure begitxoak

Zure begitxoak
bi itsaso txiki dira:
bertara joango naiz
igeri egitera.

Zure begitxoak dira
ispilutxo bi:
beren aurrean
apaintzen naiz ni.

Dantzan

Txerriak kurrin-kurrin
fandangoa dantzan,
lau hankak arin-arin.

Txerriak kurrin-kurrin
dantzan dabiltza plazan,
erori dira eta
ipurdi aldean min.

Otsoa eta atsoa

Badoa otsoa
mendian barrena,
ttipi-ttapa,
ttipi-ttapa.
Pausoa labur.

Badoa atsoa
mendian barrena,
ttipi-ttapa,
ttipi-ttapa.
Otsoaren beldur.

Pupuan trapua, Xabier Olaso, , Pamiela 2004

Ametsetan habil ene alaba,
aldi bat gehiago!
ba ama, amets egiten dut...
Eta ametsetan nahiago dut,
ipurdia kanape gainean egon baino,
negarrez Bernie Bonvoisinen erreportaiari so...
Hura bezala,
luma larrutu hegazti,
gizonen miseriak jarri etorkizun ankerrean diren
haur horiei buruz noa hegalez.
Ziur amets bati buruz noa hegalez,
dilingan den poesi xorta bati buruz,
baina bederen,
hegalez nabil.

Amaia Hennebutte, 65. Maiatz aldizkarian, 2017ko azaroa

B
Baten batek baldin bazeukan buruzagien borondatea bere beharren bridan bihurritzeko balorea, Barcenas bulldozerrak; bostehuneko billeteak biltzeko baimena, Barcenas bulartsuak; billeteokin betetako boltsatxotik bihitxo batzuk beretzat berezteko bulkada, Barcenas bihozberak. Bateon batek baldin bazeukan bankuak bisitatzeko bulda, Barcenasek; berak, barraka barruko balantzeak blokeatzeko boterea; beraxek, berdinbat, billeteen bilketa-baldintzak baimentzeko boterea, banaketak bideratzeko balorea.
Baten batek baldin badauka baten batzuen barrabilak bihurritzeko beharra, Barcenasek, boterearen bartko bidelagun borondatetsuak; bartik, baina, botereak baztertutako bilau barregarri bilakatuak.
Baten batek badauka, baldin baitere, Barcenasen biografiaren berri. Berak bila bitza B boltsako billeteak boterearen barrutietako bulegoetan, burokraziaren barrunbeetan, bila bitza barrabasbelar betikoen baratzean.

Anjel Lertxundi, Hitz beste

Ikus 2018ko martxoko Olerkia - Zein zaizkidan eder lurra eta euria, eguzkia eta eguratsa!