Erakusleihoa: Puka eta Mateoren oilarra (IKASOLAS)

Mateo okinaren oilarra eskapatu da. Katastrofe handia da oilarra beharrezkoa baitzaio okinari tenorez iratzartzeko eta herritarrendako ogi goxoaren egiteko...
Beraz Mateo oilarraren ondotik lasterka ibili da herrian gaindi, haren harrapatzeko asmoarekin. Oilarrak, aldiz, mundua ezagutu nahi du eta ez du batere etxera itzultzeko gogorik!
Lasterkaldia luzatzen da eta oilarrak gero eta lagun gehiago biltzen ditu, denak arrazoi batengatik edo bestearengatik korrika hasten direlarik: lehenik Puka artzain txakurra (kontakizunaren narratzailea), gero haur talde bat, arrain saltzaile bat, apez bat, farmazialari bat... Goitik behera, eroak bezala laster egiten dute nahasmendua sortuz herri guzian. Kalejira deitzen duten karriken itzuli handi bat egiten dute.
Jokin Mitxelena liburuaren idazlea eta irudigilea da. Marrazkilari gisa ezaguna da nagusiki, ehunka liburu ilustratu baititu. Haren marrazkiak beti biziki maitagarriak dira: haurtzaro zoriontsua irudikatzen dute, haur mukizuak lasterka, oinutsik, ezaxolak, biloak airean, arboletan zintzilikaturik...
Liburu honetan, Mitxelenak usaian marrazten duena hitzetan eman du. Askotan, haur literaturan, marrazkiek testua apaintzen dute. Hemen iduri du alderantziz dela, testuak marrazkiak apaintzen dituela eta azkenean liburu alaia eta goxoa dugu, 8 urtetik goiti irakurtzeko.

Puka eta Mateoren oilarra, Jokin Mitxelena, Elkar 2019
http://pmb.ldd.fr/ikas/opac_css/index.php?lvl=notice_display&id=35702

Ikus 2020ko ekaineko Erakusleihoa - Hitzen iruditegia
IKASOLAS