Oilasko hegalak / Rodriguez, Eider, Egilea ; Rodriguez, Arrate, Irudigilea . Erein, 2020

“Nola banatu oilasko bat ?”
Galdera hori liburuaren gibeleko azalean irakur dezakegu. Galdera sinplea, sukaldaritza edo zerbitzari ikasle berriendako azterketa gaia izan daitekeena. Baina hor ez dugu sukaldaritza aipatzen...
Behin bazen, familia biziki konbentzional bat : aita, ama, semea eta alaba. Biziki konbentzionalki, igande guziez gauza bera jaten zuten : oilasko errea patatekin eta sagarrekin, eta biziki konbentzionalki, amak zuen dena prestatzen eta kozinatzen. Igande guziez gauza bera gertatzen zen, aitak bularkia hautatzen zuen lehenik, gero haurrek izterrak hartzen zituzten eta amak hegaltxoak. Ez nahiago zituelako, hori bakarrik gelditzen zelako baizik, eta beti azkenik hartzen zuelako. Ilustrazioei begiratuz, ez zuen uros ematen horretaz, baina iduriz, familiakoak ez ziren ohartzen ere. Baina igande batez ama horri bi hegal xuri ateratzen hasi zitzaizkion bizkarrean. Eta hori aldaketen hastapena izan zen...
Gai hori - hots amaren lekua, lan zama eta ezagutza familian - tratatua da haur literaturan, eta ongi gainera ; adibidez Anthony Brownen Urdaburutarrak liburuan edo Adela Turinen Zorioneko hondamendia albumean. Baina Oilasko hegalak albumak beste zerbait ekartzen du. Denek ezagutzen ahal dugun eguneroko gertakari xume batetik abiatzen da, haurrak errazki identifikatzeko gisa. Eta interesgarria izan daiteke hiru album hauek betan lantzea, berdintasunen eta desberdintasunen azprimarrazteko.
Beste abantaila bat : euskarazko sorkuntza da, ongi idatzia. Testu guti du, euskara polit eta erritmikoan. Ez da harritzekoa, Eider Rodriguez gaur egungo idazlerik ezagunenetarik da, nahiz eta helduentzat gehienik idazten duen.
Arrate Rodriguezen ilustrazioak biziki nabarmenak dira. Arrate Eider Rodriguezen ahizpa da eta diseinatzaile-ilustratzailea da. Haren lehen lana da haur literaturan. Marrazkiak tinduz eginak dira. Frida Kahlo margolari mexikarra gogorarazten dute, kolore biziko potretak, adierazgarriak, zimur eta betazpi guziak agerian uzten dituztenak. Albuma egin zuen denboran, Arrate Rodriguez Mexikon bizi zen eta hango estiloa barneratu zuen...
Irudi estilo hori ez da batere haurkeriazkoa. Albumaren mamia sakona da. Beraz hain segur liburu hori adin desberdinetako ikasleekin irakurtzen eta lantzen ahal da, lehen mailatik kolegiora, sailartekotasuna baliatuz : euskara, herritar heziketa, arte plastikoa...
Dudarik gabe, eskolako liburutegia aberastuko duen liburua !

2021eko ekainaren erakusleihoa : Poza

IKASOLAS